الخميس، 30 أكتوبر 2008

وصيه


كالعاده كل يوم بتابع الموضوعات الجديده اللى صحابى المدونين بينزلوها وكنت فمدونه العزيز الصباغ توقفت عند جمله فالجنب كدا بتقول مدونون فى ذمه الله  لا اراديا كدا لقيتنى بدخل كل مدونه فيهم أشوف صحابها كانو عاملين ازاى

لقيت مدونات مليانه بالفرحه احيانا والحزن احيانا واليأس والنجاح والفشل ...لحظات من حياتهم سجلوها فراشات ملونه بتطير البنات صاحبات المدونات منهم اللى لسه يادوب بتحط رجلها على طريق مستقبلها وفجاه مرض مباغت ..مستشفى ..موت

الموت...الكلمه دى بترعبنى بجد مجرد التفكير فيها بيخلينى ابكى غصب عنى بخاف منه بخاف يفاجئنى وياخد حد عزيز عليا وقتها مش عارفه ازاى هستحمل واذا كنت هقدر اكمل حياتى ولا هتبقى مجرد تقضيه ايام.. ايام ملهاش طعم ولا فيها روح بارده وقاسيه 

بخاف ياخدنى انا مش عشان حاجه بس بيصعب عليا فراق اهلى وصحابى بيصعب عليا حزنهم ودموعهم بتخيل حياه ماما وبابا ولا اخواتى نصى التانى هيبقو ازاى ياترى هيقدرو يفرحو بعد كدا هينسونى ويكملو حياتهم ولا هفضل جواهم للاخر العمر

أحمد سوووو فى مدونته كاتب وصيته لو لاقدر الله جراله حاجه انا كمان عاوزه اوصيكو لما تسمعو فيوم عن خبر موتى تبقو تقرولى الفاتحه وتدعولى ربنا يغفرلى ويرحمنى ويتجاوز عن سيئاتى واذا كنت ف يوم زعلت حد منى يبقى يسامحنى ارجوكو

ماما وبابا واخواتى متبقوش تنسونى ارجوكو اكيد هتكملو حياتكو عايزاكو تفرحو بكل لحظه حلوه وتعيشوها وتفتكرونى معاكو لانى بجد بحبكم اوى اوى

بوست كئيب وحزين انا عارفه بس كان لازم اكتبه..سامحونى

35 التعليقات:

Ahmed Al-Sabbagh يقول...
أزال المؤلف هذا التعليق.
Ahmed Al-Sabbagh يقول...

موضوع حلو يا حرة وزود الحالة اللى عندى بعد ما قريت البوست بتاع اسامة
ربنا يسامحكم
انا لسه كنت كاتب موضوع عن الموت فى الدرافت
هنزلة بعد فترة

غير معرف يقول...

معنديش كلام غير سبحان الله وعلى كل حال نحمد ربنا ان فينا حته ولو صغيره عامله حساب الاخره

غير معرف يقول...

أخ
المواضيع دي بتوجعني أوي

عشان كده مش هكتر في التعليق لحس اعيط

مها ميهوووو

Unknown يقول...

ايه ده
ليه كده بس
انا مش بحب سيرة الموت ابدآ ولا الكلام عنه خاااالص
ربنا يدينا الصحه و طولة العمر يا شيخه موت و وصية ايه بس

عصر الجنون يقول...

ليه كده بس يا بنتى ...
الكلام عن الموت شى صعب جداااا
الموت علينا حق اه ولازم نفتكره فى كل لحظه ايوه ولازم نعمل حسابه فى كل حاجه فى حياتنا اكيد
المهم
ربنا يطول فى عمرك ويزيدك صحه وطاعه لله
ان شاء الله

والوصيه وصلت بعد عمر طويييييييل ان شاء الله تعالى

sad

romansy يقول...

ربنا يسامحنا كلنا ويغفر ذنوبنا
كلامك مؤثر
ربنا يرحم الجميع

اللهم ااامين

وميض ابتسامة يقول...

عموما مفيش ما يمنع من كتابتنا للوصية
ولكن انا شايف ان الحكاية معاك فيها شئ من الكأبة ..ليه؟؟

ياعزيزتى .. نحن لا نختار نهايتنا والاعمار مكتوبة .. يعنى من الآخر احنا نعمل الطيب وبس ..ونحافظ على نعم الله علينا .. ونعيش حياتنا ونحن على يقين اننا نعمل كل ما يرضى الله بقدر الامكان فالانسان ماهو الا بشر .. والخطأ فى الدنيا وارد ..

وليس معنى هذا ان تظلى فى هذا القلق والخوف من الموت .. انسى تماما كل هذا وعيشى حياتك فنحن لا نملك الا حياة واحدة.

Charisma Queen يقول...

حره الوحش هيا الدنيا اللي احنا عايشينها
هي الاستثناء
و الموت ده جزء من الدنيا
لكن ما بعدها جميل
ان شاء الله يعني
هو لو حد بيفارقنا و سافر يتفسح مش بنفرحله
مابالك باللي راح لي ربنا
طبعا احساسك منطقي و متوازن بس متقلقيش
ان شاء الله اللي جاي احسن كتير
اختك سلسبيل

Hannoda يقول...

ده أول زيارة لي هنا

رغم اني شفت تعليقاتك في مدونات كتير جدا

و منها اتمنيت يكون عندي الوقت اللي أزور صاحبة التعليقات

و أخر لون توقعت أشوفه هنا هو الاسود

مش عارفة ليه

في رأيي الموت مش لازم يشغل بالنا احنا

يعني ايه عنى اني اشغل نفسي باللي حايحصل بعد موتي.. يمكن غير حاجة واحده هي ألم اللي بيحيومي


صدقيني الموت حدث عادي جدا.. زيه زي كل سنة من العمر ما بتعدي

كل سنة جديدة سنة بتعدي
و عند الموت العمر كله على بعضه بيعدي و يخلص و بس

الموت بكون رعب و خوف و ألم لما يكول ناس غيرنا ساعتها بس بيشغلنا حانعمل ايه بعده

يارب يكتبلك عمر ماليان سعادة و راحة و اختيارات حقيقية

وآسفة لو تعليقي يدايق في اي شيء

كـــيــــــــارا يقول...

مش عارفه اقولك ايه

ربنا يرحمهم ويغفر لنا ويحسن ختامنا

safa7_karmooz يقول...

وصيتى تحت مخدتى على فكرة ^_^

ذو النون المصري يقول...

انا عامل لينكات لثلاث مدونات توفاهن الله و بالفعل بيصيبني حالة حيرة حينما اجد المدونه بالرغم من ان صاحبها مات منذ سنوات او شهور
موجود معانا حقيقة لكنه ميت ايضا حقيقة
شعور جديد و غريب طرا في نفسي بعد تجربتي لافتقاد مدون لم اعرفه الا في المدونه ثم توقف و مات

انا حره يقول...
أزال المؤلف هذا التعليق.
انا حره يقول...

احمد الصباغ

انا اسفه بجد على النكد دا

بس كان حقك نزلت البوست معانا ونقعد نعيط كلنا مره واحده وخلاص

انا حره يقول...

اسامه عبد العال

الحمد لله على كل حال

منورنى لاول مره بس انا متابعه مدونتك على فكره

انا حره يقول...

مها ميهو

ميهو ياقمرررر اخيرا ظهرتى بعد غيبه

سلامتك من الوجع ياكميله انشالله اللى يكرهوكى وحقك عليا انى نكدت عليكى

انا حره يقول...

ايمى

عااااااا

والنبى انا زعلت انى نكدت عليكو

امسح البوست الكئيب دا وخلاص ولا ايه

حقك عليا ياستى والله بس برده الموت حق ولابد منه ولازم نفتكره دايما

تحياتى

انا حره يقول...

منى واسر

طيب كويس انها وصلت اخيرا لقيت حد هيقرالى الفاتحه

اشكرك بجد لمتابعتك وبعتذر عن تقصيرى فالمتابعه عندك مع انى مليش حجه بما انى فاضيه

تحياتى

انا حره يقول...

رومانسى

امين يارب

منور دايما

انا حره يقول...

وميض ابتسامه

والله انا ماانا من النوع اللى ماسك فالدنيا ب اديه وسنانه وترعبه سيره الموت بالعكس

بس كل اسباب خوفى مش حب للدنيا اد ماهو حب للاهلى والناس الغاليه عليا

عالعموم كل كلامك صح طبعا نعمل اللى علينا والباقى لربنا

يعز عليا ان ناس اول مره تزورنى تلاقى الحزن دا بس معلش بقى

نورتنى

انا حره يقول...

كاريزما كوين

الحمد لله الحمد لله لحد دلوقتى مدوقتش طعم فراق عزيز عليا ويارب ماشوف اليوم دا يارب

نورتينى ياسلسبيل

انا حره يقول...

هنوده

هههههههه يالهوى على الاكتئاب اللى انا عملته فالمدونه دا انا حاسه انى قاعده فى عزا وناقص اقول شكر الله سعيكم

اللون الاسود مش حزن والله انا بس بيعجبنى عشان الالوان بتبقى زاهيه كدا وواضحه عليه مش اكتر

انتى ياهنودا بالظبط بالظبط قلتى احساسى انا لو مت خلاص مش هيهمنى حاجه فالدنيا هبقى مشغوله باللى انا فيه واتمنى على الله انه يكون خير

بخاف بقى من فقد حد عزيز عليا

نورتينى بجد والله ومتابعه مدونتك من زماااااااان

انا حره يقول...

كيارا

امين يارب

انا حره يقول...

سفاح كرموز

كاتب فيها ايه بقى

انا حره يقول...

ذو النون المصرى

العريس عندنا يامرحبا يامرحبا

سيبك انت من سيره الموت والنكد دى وخلينا فرفشه الجواز ياعم

الف مبروك ومنورنى

Selfmeaning يقول...

تقريبا انا خلصت كل حاجة و رتبت الامور كده مش هيبقى فى وصية الا جزء صغير يخص بوجى اللى لسه معرفتش مين هيكمله بعدى

Selfmeaning يقول...

على فكرة البوست الجديد بتاعك لينكه عندى ياريت تتعطفى علينا و تنشريه

موناليزا يقول...

تعرفى ان الموت ده الحاجة الاكيدة اللى فى حياتنا وعادى لما نفتكره ماهو رسولنا عليه الصلاة والسلام وصانا بذكر الموت حتى تخشع قلوبنا ولاننجرف وراء اهوائنا
وربنا يرحم موتى المسلمين جميعا
وجميل انك دخلتى على مدونات اصحابها فى ذمة الله لانها تعتبر رسالة من الله لنا بالا نترك بعد موتنا الا مايفيد الناس ويكون صدقة جارية
وليتذكرنا الناس بحسن كلامنا فيدعوا لنا
بوست يستحق التقدير

إيمان قنديل يقول...

يابنتي بقي أنا جايه أخطبك لأبني الاقيكي كاتبه وصيتك ، يلا ابعتي لي صورتك ومعلومات عنك وانا حا ابعت لك صوره العريس والسي في بتاعه

حزينه يقول...

ربنا يديكى الصحه علشان تعملى كل حاجه خير
واكيد حنفتكرك بالخير

بس بلاش الحزن دة وسيرة الموت لوحدها تبكى

بوست جميل




حزينه

إيمان قنديل يقول...

ياعسوله تعالي شوفي التحديث وكمان غيرت لك الأغنيه ياخطيبة ابني

(صندوق الدنيا) يقول...

سبحان الله
فعلا لابد أن نتفكر في هذا اليوم الذي سنغيب فيه...ويبقى ما خططناه ليقرؤه غيرنا
وربما يدعوا لنا
فلنكتب خيرا لنحصد خير

Hannoda يقول...

متابعة مدونتي أنا!!

ده مفاجأة جميلة جدا .. بجد أنا بتنطط من الفرحة

:)

تحياتي

انا حره يقول...

سلف ميننج وكباريه وام البنين وهنودا ومنواليزا وحزينه

شكر الله سعيكم جميعا ياجماعه ويارب مااجيلكو فى بوست كئيب كدا

 
template by suckmylolly.com flower brushes by gvalkyrie.deviantart.com