السبت، 29 نوفمبر 2008

يمكن مكافأه؟؟ ليه لا


اخيرا بالونات وعصافير

ليله حلوه ودافيه

مش بتتكرر كتير

صحيح محصلش اى حاجه جديده

بس كفايه انى مبسوطه 

مسلسل وكام اغنيه ورقصه مع كبايه شاى مظبوطه

كفايه

الجمعة، 28 نوفمبر 2008

باخد ب ايدى


رقصه شهيه هيا الحياه

بالعشوقيه والمعشقه

مره فمره حلمك هواه

يملى الدنيا بالزقزقه

ويبقى الحلم صوره وصوت

لو بطلنا نحلم نموت

حبه صبر 

حبه حماس

يبقى الحلم صوره وصوت

الخميس، 27 نوفمبر 2008

shh....


حاجات كتير عاوزه اكتب عليها بس مش عارفه ليه مش لاقيه كلام اكتبه

ميت موضوع 

حاجات خانقانى وحاجات مفرحانى

حاجات بعملها وراضيه عنها بس فنفس الوقت مش عاجبه الناس

ناس دايما بتحاول تطلعك غلطان وبتحقر من اللى انت عملته وتحرق دمك عالمسا

هوا انا ليه بدون اساسا ؟؟؟  

طيب ايه لازمه وجود الناس فحياتنا ؟؟؟

ليه دايما بنفتكر الانتقادات الوحشه وبننسى  الانطباعات الكويسه ؟؟؟

ليه بحب مسلسل sex and the city رغم انى مبحبش التليفزيون وليه كل سؤال كارى بتساله لنفسها بطبقه على نفسى ؟؟

هوا ينفع اقعد لوحدى فتره طويله فهدوء تام محدش يكلمنى مع نفسى كدا بس ساعتها مش هلاقى غير الافكار تصدع دماغى وانا دماغى مش مستحمله؟؟؟

من يومين عماله افكر فى انطبعاتى عن السنه اللى هتخلص وبفتكر ايه اللى حصل فيها كام مره فرحت وكام مره عيطت كام مره جاتلى لطشه حب مين الناس اللى عرفتهم للاول مره ومين اللى بقو مجرد ماضى؟؟؟

ياترى السنه الجديده هتبقى عامله ازاى ؟؟؟

بفكر اعمل مدونه محدش يعرف عنها حاجه ولاحد يزورها واقعد اهيس فيها واكلم نفسى 

هوا ليه المدير بتاعى غتت وقليل الذوق كدا كل يوم يعمل فيا مقلب ويقصد يهينى ويحرجنى 

اصلا انا بكره الشغل وعند اول فرصه هاخد اجازه واقعد فالبيت 

ينفع اعمل ريستارت لكل حاجه؟  ولا الاحسن نعمل شت دوان ونخلص ؟

هيا ليه الحياه مبتمشيش شويه زى مااحنا عاوزين؟؟؟

معرفش اجابه ولا سؤال من دول انا هقوم انام احسن

الأحد، 23 نوفمبر 2008

شويه عنى


ينزعج رئيسى فالعمل عندما اخبره عن وجود صديق عزيز جدا على قلبى وقريب منه ايضا يمكننى ان ابوح له عن كل مايؤرقنى او يتعبنى دون ان اخجل منه او اخفى عنه شيئا .. يخبرنى ونبرات صوته وابتسامته توحى بأنه يقصد الانقاص من تربيتى انه لم يكن ليسمح لاخته ان تفعل فعلتى الشنعاء وينصحنى الا اخبر احدا بالجرم الذى افعله لانه ببساطه لاتوجد صداقه حقيقيه بين شاب وفتاه فالشيطان لابد ان يتدخل ليلعب بعقل احدهما خصوصا الشاب ويوحى له بافكار وخيالات قليله الادب.... فى سرى اوبخ نفسى واقول تصدق انا غلطانه ان انا قلتلك حاجه من الاساس

.................

الحمد لله اخيرا استطعت ان اتشافى من نوبه الحب التى اصابتنى مؤخرا دون حدوث اى مضاعفات لقلبى لم اعد افكر فيه ولا اتخلس النظر اليه من خلف الشباك ... لا ادرى ماهو السبب وراء هذا الشفاء المفاجىء ولكنى على اى حال سعيده به ..  وها انا ذا مره اخرى مع نفسى راضيه بها الى جوارى دون دموع ولاقلب متعب ولافكر شارد ..  يبدو انها كانت مجرد لطشه حب وراحت لحالها

................

علاقتى بربى مازالت تجرى على نحو لاارضى عنه مجرد محافظه على الصلاه وبعض الادعيه القليله ولكنى بداخلى لازلت اجتفظ بتلك النفس اللوامه المتعبه التى تؤنبنى وتعنفنى كلما ارتكبت خطئا واحمد الله عليها .. أظن انه سوف يأتى اليوم الذى اعود فيه لعلاقتى الحقيقه بربى فقط احتاج لطاقه من النور او من الممكن ان اكتفى ببصيص منه ينير لى الطريق ويعطينى الطاقه والدفعه كى انفض عن قلبى ذلك اليأس الذى يسكنه منذ فتره

.................

بقالى كام مره كل لما اكتب بوست اتفاجىء انى كتباه فى يوم فردى 13 او 17 او 19 وانا بكره الارقام الفرديه جدااا معرفش ليه صحيح بتغاظ بس هيا بتيجى كدا بقى

...............

بس خلاص

الأربعاء، 19 نوفمبر 2008

سوووسه


سوووسه .. سوسه .. سوسه

سووووسه كف عروسه

سوسه واللى يصقف يستاهل منى بوسه

يستاهل منى بووووسه

احرف  وكلمات ولحن يحملنى من مكانى لعالم اخر بعيد.. بعيد جدا لاادرى كيف استطاع مؤلفها ان يطعمها بكل هذا القدر من الحنان والحب العفوى الربانى

يعلم كل من حولى حبى الفطرى للاطفال وعشقى اللامحدود للاطفالى الصغار الذين مازالو فى علم الله حتى الان 

مشاكل وهموم واحزان قد تصل حد الاكتئاب احيانا اتناسها تماما و الى الابد بمجرد سماعى لهذا الصوت الدافىء ينشد تلك الكلمات التى احسبها تخرج من قلبى انا لا من قلب المؤلف

سوووسه خبط خبط

طبطب ياابو كف مبطبط

ولا تغلط ولا تتلخبط دا مفيش اسهل من سوسه

سقف خلى الضحكه ترف وارقصلى ولف ولفلف

رقص قلبى المتلهف على تسقيفه ننوسه

على تسقيفه ننوووسه

اغمض عينى ..اجدنى جالسه بجوار صغيرى .. عشقى الحقيقى النائم .. اتأمل ملامحه وامسك بكفه الصغيره المنمنه الناعمه الاحظ حركه مقلتيه واتسائل ترى بم تحلم هل تطير مع الملائكه فى سماء زرقاء ام تلعب معهم على عشب اخضر فى مكان فسيح  ام تطارد فراشه رقيقه مثلك وتحاول ان تمسك بها؟؟؟  متى ستفتح عينيك كى تضىء سماء قلبى الذى استوحشك كثيرا؟؟؟

دقدق دقدق بكفوفك

بكفوفك دشدش خوفك

نفسى تكبرلى واشوفك ماسك بيها الشموسه

بكفوفك دقدق دقدق عصفوره قلبى تزقزق 

يسلملى كفه محندق وضوافرينه فسفوسه

وضوافرينه فسفوووسه

لالا لا اطيق انتظار استيقاظه دعنى احلم بمكان اخر وليكن الريسبشن نجلس سويا على الارض المزيد والمزيد من قطع المكعبات الملونه تتناثر يمينا ويسارا تمسكها بكفك الصغير وتلقى بها بعيدا تضحك كثيرا عندما اجرى خلفها كى احضرها لك ايها الشقى الصغير اقبلك واحتضنك والف بك سريعا اعرفك جيدا تفرحك تلك الحركه الجنونيه التى تشعرنى انا وانت بالدوار للحظات

سقفلى وعلى تسقيفك تمشى الدنيا على كيفك

بابا هنا ف اوضتك ضيفك سقف هاتله بسبوسه

سقف دا انا على تسقيفتك بحنان قلبى لفلفتك

ياسلاملم على مزيكتك 

نونو اوى انما محسوسه

نونو اوى انما محسووووووسه

حان وقت النوم تضع راسك على صدرى بينما احوطك انا بذراعى كعادتك لا تنام الا على صوتى وانا اهمس لك بحدوتك المفضله

(( كان ياماكان ياسعد يااكرام كان فى ولد عسول خالص مالص اسمه بيدو كان بيحب مامى ومامى كمان كانت بتعشقه بس هوا كان شقى خالص وعفريت ومكانش ينام الا لما مامى تحكيله حدوته الفراشه الصغنططه ام بلوزه منقطه......))

ملحوظه على جنب: يارب يارب ومن جوا قلبى يرزق كل واحده محرومه من الاطفال ويرجع كل طفل غايب لحضن امه ويشفى كل طفل مريض يارب

الاثنين، 17 نوفمبر 2008

سوء تفاهم

ممكن تقبل اعتذارى

خانتنى كلماتى 

انا متلخبطه

بص

انا هلف وارجع تانى

هرجع للشط قبل مالموجه تشدنى اكتر

اصلى للاسف الشديد

مبعرفش أعوم

....

الجمعة، 14 نوفمبر 2008

وقت الحصاد

اللهم انى أمتك .. بنت عبدك .. بنت أمتك
ناصيتى بيدك
ماض فيا حكمك
عدل فيا قضاؤك
عدل فيا قضاؤك
عدل فيا قضاؤك
الظاهر جه الوقت اللى هتجنى فيه اللى زرعتيه
بس ياترى هتبقى راضيه
و من جواكى مقتنعه ب ان دا نتيجه طبيعيه
ورد منطقى
وعقاب عادل
ولابرده لسه هتقاوحى
وتعملى بريئه ومسكينه ومظلومه
واجهى نفسك بقى
رتبى اوراقك
ارجعى للطريق
واستعدى لوقت الحصاد

الأربعاء، 12 نوفمبر 2008

شكرا سيدى

نظرته
فتحت شبابيك قلبى
وزرعت جواه ورد
وركبتنى مرجيحه طلعتنى فوووق
وسكنتنى فوق سحابه كبيره ناعمه
جنب القمر



الاثنين، 10 نوفمبر 2008

فضفضه



ليله طويله قضتها بين استعطاف للنوم انه يريحنى وبكاء هيستيرى من غير اى سبب جديد واضح

بكيت كما لم ابك من قبل

لوحدى من غير صوت

اقنعت نفسى انى بكره هرجع من الشغل اترمى فحضن أمى واعيط واقولها انى تعبانه

روحى بتوجعنى ومش مبسوطه

اخيرا حن النوم عليا ورحمنى من البكاء بس سابنى فريسه للكوابيس

الصبح

عنين متورمه ورغبه شديده فالنوم

اخيرا قمت لبست وخرجت من غير اى الوان ولا ميك اب

مليش نفس اصلا

انا بس عاوزه اعيط

صحبتى الانتيم هيا كمان نفسها تعيط لسبب ابسط بكتير منى

فالعربيه

نفسى اشكيلها واقولها اللى فيا

الكلام على طرف لسانى

لسه هبدا احكى

لسانى اتلجم

ليه تحكيلها

هتعملك ايه

هتطبطب عليكى وتقولك معلش استحملى بكره احسن

وبعدين

ايه هيتغير

كل اللى هيتغير انك هتتعرى قدامها

هتبانى ضعيفه ومسكينه ومكسوره وبس

اسكت

ابتسم

اقولها احكيلى

مالك

فضفضيلى ياحبيبتى

تبكى

احضنها

اقولها معلش بكره احسن ..اصبرى ..واطبطب عليها

اما انا

هحضن قلبى بنفسى

مش محتاجه طبطبه من حد

الخميس، 6 نوفمبر 2008

تخاريف


لعبه بازل

تستمتع وانت بترص قطعها جنب بعض

مستنى لوحه حلوه صنعتها ب ايديك

وفجاه

تكتشف ان اهم قطعه مش موجوده

ضايعه

وان لوحتك خلاص ملهاش قيمه ولا لازمه

هكذا هي أحلامها دائما

ولكن لابد لها ان تبتسم وتمضى فى طريقها

الاثنين، 3 نوفمبر 2008

ايامنا الحلوه


نغمه تفتقدها منذ فتره تخبرها بأن هاتفها الذى أوشكت ان تنساه قد استقبل لتوه رساله
كعادتها دائما يتملكها الرعب حين تستقبل رساله تردد بداخلها
استر يارب ترى مالذى حدث
تخشى دائما ان يكون احدهم قد اصابه مكروه
تمسك هاتفها وتبدا فى قراءه الرساله
وحشتينى اوى ياحره ووحشتنى ايامنا الحلوه مع بعض ياترى فاكراها ولا نسيتى لما بعدتى ياريت لو نتقابل كلنا قريب
يااااااه  صديقتى العزيزه
جميل ان يظل مكانك فى قلوب الاخرين محفوظ رغم البعد
انا ايضا افتقدك كثيرا وافتقد احلى ايامى بينكم رغم قصرها
الحنين دائما يحملنى اليكم
اتذكرك عزيزتى واتذكر حقيبه يدك المملوءه بالبنبونى والشكولاته وبعض المسكنات والشاى ابو فتله والسكر بجانب حافظه نقودك وموبيلك والكثير الكثير من الاشياء
كثيرا ماضحكنا وتعجبنا من تلك الشنطه المحبوبه من الجميع دى ولا شنطه واحده صينيه بتاعت هاجات هلوه
الكثير من الذكريات والضحكات والدموع والحكايات احملها لكم داخل قلبى
thanks vodafone
فلولا عرضك تك تك وتررن تررن ما اتيحت لى تلك الفرصه كى اعرف بمكانى المحفور داخل قلوب الكثير من احبائى 
يكفينى انى كنت ممن اختاروهم كى يحملوك رساله لى مفادها
بنحبك وحشتينا

الأحد، 2 نوفمبر 2008

لولولىىىىىى


لولولولولىىىىىىىىىىىىىىى

عقبال عندكو ياحبايب 

عقبال ولادك ياام  سيد

والله وعملوها الرجاله 

بابا وماما وخالى والاستاذ جارنا والمدرس بتاع اختى الصغيره والمدرسين بتوعى اللى من عهد الفراعنه وقربو يطلعو معاش

كلهم كلهم نجحو الحمد لله

وجابو مجاميع تشرف 

وان شاء الله هيدخلو كليه الطب ويبقو اساتذه دكاتره باشمهندزين لو يحبو كمان

وبهذه المناسبه العظيمه بهديلهم اغنيه الناجح يرفع ايده هيييييييه

سامحينى


من الغباء انك تعيش زى الملاك بين البشر

لست ملاكا ولكنهم بأفعالهم  يجبروننى على التلون والحذر

يقتلون عفويتى  بسوء نيتهم ويسربون النفاق تدريجيا الى دمى 

 اكتشفت أنه كى استطيع التأقلم مع عالمى الجديد لابد وان اصبح جزءا منه

ان اصبح مثل ساكنيه

بشرا

 
template by suckmylolly.com flower brushes by gvalkyrie.deviantart.com