الأربعاء، 19 نوفمبر 2008

سوووسه


سوووسه .. سوسه .. سوسه

سووووسه كف عروسه

سوسه واللى يصقف يستاهل منى بوسه

يستاهل منى بووووسه

احرف  وكلمات ولحن يحملنى من مكانى لعالم اخر بعيد.. بعيد جدا لاادرى كيف استطاع مؤلفها ان يطعمها بكل هذا القدر من الحنان والحب العفوى الربانى

يعلم كل من حولى حبى الفطرى للاطفال وعشقى اللامحدود للاطفالى الصغار الذين مازالو فى علم الله حتى الان 

مشاكل وهموم واحزان قد تصل حد الاكتئاب احيانا اتناسها تماما و الى الابد بمجرد سماعى لهذا الصوت الدافىء ينشد تلك الكلمات التى احسبها تخرج من قلبى انا لا من قلب المؤلف

سوووسه خبط خبط

طبطب ياابو كف مبطبط

ولا تغلط ولا تتلخبط دا مفيش اسهل من سوسه

سقف خلى الضحكه ترف وارقصلى ولف ولفلف

رقص قلبى المتلهف على تسقيفه ننوسه

على تسقيفه ننوووسه

اغمض عينى ..اجدنى جالسه بجوار صغيرى .. عشقى الحقيقى النائم .. اتأمل ملامحه وامسك بكفه الصغيره المنمنه الناعمه الاحظ حركه مقلتيه واتسائل ترى بم تحلم هل تطير مع الملائكه فى سماء زرقاء ام تلعب معهم على عشب اخضر فى مكان فسيح  ام تطارد فراشه رقيقه مثلك وتحاول ان تمسك بها؟؟؟  متى ستفتح عينيك كى تضىء سماء قلبى الذى استوحشك كثيرا؟؟؟

دقدق دقدق بكفوفك

بكفوفك دشدش خوفك

نفسى تكبرلى واشوفك ماسك بيها الشموسه

بكفوفك دقدق دقدق عصفوره قلبى تزقزق 

يسلملى كفه محندق وضوافرينه فسفوسه

وضوافرينه فسفوووسه

لالا لا اطيق انتظار استيقاظه دعنى احلم بمكان اخر وليكن الريسبشن نجلس سويا على الارض المزيد والمزيد من قطع المكعبات الملونه تتناثر يمينا ويسارا تمسكها بكفك الصغير وتلقى بها بعيدا تضحك كثيرا عندما اجرى خلفها كى احضرها لك ايها الشقى الصغير اقبلك واحتضنك والف بك سريعا اعرفك جيدا تفرحك تلك الحركه الجنونيه التى تشعرنى انا وانت بالدوار للحظات

سقفلى وعلى تسقيفك تمشى الدنيا على كيفك

بابا هنا ف اوضتك ضيفك سقف هاتله بسبوسه

سقف دا انا على تسقيفتك بحنان قلبى لفلفتك

ياسلاملم على مزيكتك 

نونو اوى انما محسوسه

نونو اوى انما محسووووووسه

حان وقت النوم تضع راسك على صدرى بينما احوطك انا بذراعى كعادتك لا تنام الا على صوتى وانا اهمس لك بحدوتك المفضله

(( كان ياماكان ياسعد يااكرام كان فى ولد عسول خالص مالص اسمه بيدو كان بيحب مامى ومامى كمان كانت بتعشقه بس هوا كان شقى خالص وعفريت ومكانش ينام الا لما مامى تحكيله حدوته الفراشه الصغنططه ام بلوزه منقطه......))

ملحوظه على جنب: يارب يارب ومن جوا قلبى يرزق كل واحده محرومه من الاطفال ويرجع كل طفل غايب لحضن امه ويشفى كل طفل مريض يارب

31 التعليقات:

يا مراكبي يقول...

ده حب أنثوي فطري .. يمكن رجالة كتير ما يلاحظوه لكن ما يفهموهوش كويس

هي دي طبيعة الأمومة اللي ربنا سبحانه وتعالى حطها في الأنثى ولولا كده كانت الدنيا باظت ولا كانش حد لقي حد يسهر عليه ويهتم بيه ويرعاه

Kiara يقول...

ربنا يرزق المسلمين بالذريه الصالحه عارفه وانا بقرا البوست حسيت اني بدمع وعاوزه اخد البت ندي في حضني وحشتني بنت الايه

safa7_karmooz يقول...

يااااه

كل ده من سوسة كف عروسة.....

امال لو دخلنا على باقى التراث هتعملى ايه

^_^

Hannoda يقول...

بالضبط ده هو الوصف المفصل للأمومة

الاحساس ده بقعد اتفرج عليه بانبهاااار تام و اعجاب و عرفان لله خالق القلوب

الحكاية يمكن مالهاش علاقة بحب الاطفال

ليها علاقة بالامومة

احساس غالي قوي
بتمناه أكتر من أي حاجة تانية في الدنيا

يارب يملى بيه حياتك و حياته

كلماتك خدتني لبعيييد قوي

:)

تحياتي

عاشقه وغلبانه يقول...

احساس فطري سبحان من اوجده في قلب كل ام
ازاي مانحبش طفل عاش وكبر واتنفس وخبط واتحرك جوانا
هي دي الامومه وضيفي علي اغنيه سوسه
اغنيه حبيبه امها للصبوحه
احساس مايتوصفش
ربنا يارب بجد ومن كل قلوبنا يرزق كل محروم ويزيد ويبارك فيما اعطي لكلام ام وكل اب
دمتي بكل خير واتمني نصبح اصدقاء
dr/sally

الربان يقول...

تحياتي

ما اجمل البوست الرقيق...و اغاني الطفولة العذبه.

ربنا يسعد الجميع و يعطي كل سائل سؤله
و يشفي المرضي كلهم...اطفالا و كبارا.

تحياتي و تقديري

وميض ابتسامة يقول...
أزال المؤلف هذا التعليق.
وميض ابتسامة يقول...

ما أجمل مشاعر الامومة .. المتدفقة الناعمة .. التى لاتعرف الغش ولا الخداع انها الحب للحب ....
كنت وما ازال اراقب حفيدى الاول واداعبه واحيانا اغنى له وارى ضحكته البريئة .. فيذوب قلبى حبا له .. واقضى الساعات بجواره بلا ملل ..واتركه
وصورته لم تبارح خيالى
اذا كانت هذه مشاعرى انا فكيف تكون مشاعر أمه .. التى لا يضاهيها مشاعر
اللهم احفظ لنا اولادنا واحفادنا ..آمين

فاتيما يقول...

ياااااااااه على رقتك
و جمالك يا عزيزتى
الغنوة بديعة
و كلماتك أبدع
حسيتك بتتكلمى عنى و عنك و عن كل ام
ربنا يستجيب لدعائك
و لقلبك الطيب
تحياتى و هبقى عندك علطول بإذن الله
تحياتى و حبى

Mahdi Mahdi يقول...

يلزمنى رايك فكن ناصحا ولا ملامة، فهدفى افهام المرضى والموتورين ممن يتطاول او يخادع بدس السم فى العسل تحت دعوى الدفاع عن الاسلام ، ان العين بالعين والسن بالسن والبادى اظلم ، وجنت على نفسها براكش

حواء يقول...

فعلا اغنيه جميله جدا جدا
وتحسي بيها اكتر لما يكون طفلك عنده سنه ويادوب بيتعلم المشي ويسقف لاول مره
فعلا احساس الامومه شئ رائع
بس خالي بالكم الاطفال مش علي طول حلوين سعات من شقوتهم تبقي عايزه ترمي نفسك من البلكونه او ترميه هو
فعلا في بعض الاحيان بيبقوا مزعجين جدا جدا
بس حلوتهم وطعمتهم بتغطي علي ازعاجهم
وربنا يدي كل محروم يارب
ويرجع الغايب لاهله

Ahmed Hishmat يقول...

جميلة

dr. Ahmed Sakr يقول...

فكرتينى بحاجه تانية كمان

نوسه يا نوسه مين يدى لبابا بوسه

ببقى قاعد مع العيال أولادى وأغنيها ليهم علشان نشوف مين اللى هيعطيها الأول

ههههههه

Selfmeaning يقول...

هتخلينى كل مرة اغيها ليكى
عشان اكتئابك ينتهى
و هغنى ليك اغانى كتيرة برده
بعدها هتشكى فى سنى الحقيقى و تحسى انك تعرفى واحدة عندها 3 سنين
بس فعلا عالم الاطفال عالم لا ينتهى من الابتسامات و الخيال كنت بتمنى ااعيش فيه عالطول و حاليا بتمنى انى اتجوز و ربنا يرزقنى بطفل لا مش واحد قولى فريق كرة عشان اعيش فى عالمهم شوية

و يارب انتى كمان و كل البنات

أبو العريف يقول...

زي العسل والله
ربنا يوفقك
زوريني

موناليزا يقول...

جمييلة جدا
وياريت تكتبى كلمات اغانى الاطفال على طول

(صندوق الدنيا) يقول...

إنها نعمة...وإختبار...ولن يعلم قينا كل منا كف كانت تحبه أمه
إلا بعد أن حمل قرة عينه بين يديه
اللهم أطعم كل من يتمنى الأمومه والأبوة
واشف مرضانا ومرضى المسلمين
تحيات وتقديري أختي الحبيبة

DR.HAMAS يقول...

مشاعر جميلة

و ده شئ فطرى مغروس فى قلوب البنات تحديدا

لكى تستمر الحياة

و يهتم الناس بالأجيال القادمة

حقيقى احنا مش عارفين أمهاتنا كانو بيحبونا قد ايه

و بنعاملهم بأقل مما يستحقون

و أحيانا نخطئ فى حقهم



جزاكم الله خيرا



د.حماس

Unknown يقول...

الاغنيه رجعتني لايام الطفوله
كانت حلوه اوي فعلا

ربنا يسعدك يارب ويحققلك كل اللي بتتمنيه

البوست حلو اوي

رفقة عمر يقول...

ماشاء الله لاقوة الا بالله ربنا يخليلك بيدو وتفرحى بيه ويكون بارا بكى اللهم امين

romansy يقول...

الاطفال دول اجمل نعمه من ربنا
هما البراءه والحنان
ربنا يرزق كل المسلمين بالذريه الصالحه

انا حره يقول...

بشركم جميعا لمتابعتى واهتمامكو بالتعليق

مش لاقيه رد لكل تعليقاتكو الا زى ماقلت ربنا يرزق الجميع ويشفى كل مريض يارب

تحياتى ليكم

kochia يقول...

من ارق التدوينات اللي قريتها من يوم ما اتعلمت القراية حتي الان ...

ربنا يرزقك الذرية الصالحة ان شاء الله وتتمتعي بكل لحظة امومة ربنا يعطيها لكِ
ويارب يعطيها للكل ان شاء الله

تحياتي

blackcairorose يقول...

طبعا انتى عارفه انها كلمات سيد حجاب مش كده؟
اغانى الالبوم ده كله كانت حلوة وبتفكرنى بولاد اخواتى لان اختى اشترته ليهم وهمه صغيرين فدايما بفتكرهم بالاغانى دى، وهمه دلوقتى ما شاء الله كبار وفيهم المتجوزين كمان

عقبال اولادك ان شاء الله

mahasen saber يقول...

يا حبيبتى ربنا يباركلك فيه وميحرمكيش منه ابدا
فعلا فعلا يا حره دول زينة الحياة الدنيا وهما بلسم الحياه

يعنى الامومه دى احساس وشئ لا يوصف
تخيلى انا كان ابنى مبينمش وهو صغير رضيع يعنى الا على رجلى وانا قاعده على كرسى بعينه فى الريسبشن ورافعه رجلك بشكل معين وميله بطريقه ما وافضل كده سبع تمن تسع ساعات عادى واستحمل عشان مكنتش ااقدر اسمعه بيعيط

ياه ربنا يرزق المحتاج فعلا

وربنا ما يحرمك من ابنك وكل من تحبين
وامممممموووووووووووووووه منى ليه ومنى ليكى برضه
يا صديقتى الجميله الحره

msafa يقول...

ايه كمية الالم اللى فى البوست ده
بس والله رائع

Unknown يقول...

السلام عليكم


بلوج هادف وجميل

الموضوع رائع بجد

وحقيقي ربنا يرزق كل الناس بكل مايتمنوا

انا حقيقي استمتعت


تحياتي ليكي

برقش

اقصوصه يقول...

امين يارب

حلوه التدوينه

استمتعت بقرائتها:)

kh يقول...

استطيع ان اقول انك بكل بساطه مثال للمراه للانثى للأم ولذلك يقول الرسول صلى الله عليه وسلم
الجنه تحت أقدام الأمهات


يمكن مراسلتى على مدونتى


http://successka.blogspot.com/

شادي أصلان يقول...

بوست ينضح بالرقة والمشاعر الرائعة

وبخصوص دعائك الاخير

امين امين امين

koukawy يقول...

ربنا يديكي

 
template by suckmylolly.com flower brushes by gvalkyrie.deviantart.com