إليك

السنه خلصت خلاص

كنت انت احلى حاجه فيها

صحيح مفرحتنيش ولا كنت عند مستوى احلامى اللى عشت استناها طول عمرى

بس أهو غصب عنى بقى

اتعودتك وعشمت نفسى بالفرح فى يوم

استنيته معاك ومجاش

انت اللى روحت

واخدت معاك عشمى واحلامى وقلبى

وسبتنى بضحك بصوت عالى عشان ادارى وراه دموعى وكسرة قلبى وخاطرى

بس عارف انا لما بدخل انام بفتكرك وبحن ليك اوى

بمسك موبيلى عشان اكتبلك رساله فى نص الليل اقولك وحشتنى

أقولك محتاجاك

بكتب كلام كتير وفالاخر بعيط وامسحه

عارفه انك مش هترد عليا ولا هتحس بيا

ماانا بعتلك كتير قبل كدا والرد .........

ولا حاجه

هو انت ليه عمرك مارديت عليا

طب هو انت ليه عمرك ماافتكرتنى

هو انت ليه اصلا سبتنى

هه

ليه

عشان كنت طيبه معاك زياده عن اللزوم؟!

عشان كنت بقعد اسمعك وانت بتحكى مواقف وكلام تحرق دمى واعصابى وانا محتفظه بابتسامه على وشى وجوا منى نار قايده؟؟!!

ولا علشان انت اصلا مكونتش لايق عليا

كلهم قالو كدا بعد ماانت مشيت

انا الوحيده اللى كنت فرحانه بيك

انا الوحيده اللى حبيتك

انا الوحيده اللى عايشه بيك وليك

وانا الوحيده اللى بدفع تمن قراراتكم